Уначы 11 ліпеня ў рэанімацыі «пры нявысветленых абставінах» памёр палітвязень Алесь Пушкін. Пра гэта паведаміла ў Facebook ягоная жонка.
У гродзенскай турме № 1 журналісту «Люстэрка» сказалі, што ўсе падрабязнасці таго, што адбылося з 57-гадовым Алесем Пушкіным, ведаюць яго сям’я і родныя, і параілі звяртацца да іх.
Алеся Пушкіна затрымалі 30 сакавіка 2021 года ў вёсцы Жылічы Кіраўскага раёна Магілёўскай вобласці, дзе ён працаваў на рэстаўрацыі мясцовага палаца. Прэтэнзіі ў следства ўзніклі да ягонага цыклу, напісанага больш за 20 гадоў таму. Прапаганду нацызму ўгледзелі ў партрэтах дзеячаў антысавецкага падполля часоў Другой сусветнай вайны, якіх улады лічаць памагатымі нацыстаў.
У канцы сакавіка 2022 года суддзя Алена Шылько прызнала Пушкіна вінаватым і прызначыла яму пяць гадоў пазбаўлення волі ў калоніі строгага рэжыму. Абвінаваўцам па справе Пушкіна выступаў Аляксандр Кароль. Ён таксама падтрымліваў дзяржабвінавачанне на працэсах «Вясны», Эдуарда Бабарыкі, Марыі Калеснікавай і Максіма Знака.
Як паведамляў «Белсат», падчас паседжання 25 сакавіка мастак паспрабаваў парэзаць сабе жывот на знак пратэсту. За гэта яго адправілі на 13 сутак у карцар.
15 красавіка 2022 года Алесь Пушкін быў этапаваны з СІЗА-1 у папраўчую калонію № 22. У жніўні 2022 года стала вядома, што адміністрацыя папраўчай установы змясціла палітзняволенага мастака на 5 месяцаў у ПКТ.
Паводле інфармацыі праваабаронцаў, суддзя Івацэвіцкага раёна Аляксандр Кірыловіч 11 лістапада 2022 года пастанавіў перавесці Алеся Пушкіна на турэмны рэжым на паўтара года. Неўзабаве палітвязня этапавалі ў гродзенскую турму № 1.
Нагадаем, 21 траўня 2021 года ў зняволенні «пры нявысветленых абставінах» памёр актывіст з Бярозаўкі і сябра Партыі БНФ Вітольд Ашурак. Пакаранне ён адбываў у шклоўскай калоніі. Крымінальнай справы па гэтым факце заводзіць не сталі. Паводле афіцыйнай версіі, ён памёр ад спынення сэрца. Родныя і паплечнікі палітвязня перакананыя ў гвалтоўным характары яго смерці.
У траўні 2023 года ў віцебскай папраўчай калоніі № 3 памёр палітвязень Мікалай Клімовіч. Ён меў інваліднасць II групы праз хваробу сэрца. Мужчыну абвінавацілі ў абразе Аляксандра Лукашэнкі за сатырычную выяву, якую Клімовіч размясціў у сацыяльных сетках, і асудзілі па арт. 368 КК РБ на год пазбаўлення волі.
26 красавіка з’явілася інфармацыя пра тое, што Віктар Бабарыка, зняволены ПК-1 Наваполацка, у ноч на 25 красавіка быў шпіталізаваны ў гарадскую бальніцу — нібыта са слядамі збіцця і пнеўматораксу. Раніцай 27 красавіка блізкім палітыка ўдалося пацвердзіць факт яго шпіталізацыі ў хірургічнае аддзяленне. Дзяржорганы каментаваць сітуацыю адмовіліся. Пра стан Віктара Бабарыкі нічога не вядома ўжо больш за два месяцы.
Ноччу 28 лістапада 2022 года шпіталізавалі ў рэанімацыйнае аддзяленне бальніцы палітзняволеную Марыю Калеснікаву, дзе ёй зрабілі аперацыю ў сувязі з прабадзеннем язвы. Непасрэдна перад шпіталізацыяй Калеснікава, нягледзячы на сур’ёзныя праблемы са здароўем, больш за 10 дзён утрымлівалася ў штрафным ізалятары — адзіночнай неацяпляльнай камеры. Там было немагчыма спаць праз холад, яна ўвесь час хадзіла, каб сагрэцца. Хоць падчас знаходжання ў адзіночнай камеры Калеснікава неаднаразова страчвала прытомнасць і пакутавала ад гіпертаніі і прыпадкаў млоснасці, улады адмаўляліся пераводзіць яе ў бальніцу, пакуль яе стан не стаў крытычным.
У гомельскай бальніцы хуткай дапамогі Калеснікава прабыла каля тыдня, пасля чаго яе этапавалі ў медсанчастку калоніі.
Праваабаронцы, сваякі беларускіх палітвязняў і незалежныя СМІ не раз звярталі ўвагу ўладаў і сусветнай грамадскасці на нечалавечыя ўмовы, у якіх утрымліваюцца асуджаныя за пратэсты 2020 года. Ім абмяжоўваюць зносіны, перапіску, рэгулярна адпраўляюць у штрафныя ізалятары, а потым — у памяшканні камернага тыпу, «вешаюць» новыя крымінальныя артыкулы за непадпарадкаванне патрабаванням адміністрацыі папраўчай установы і падаўжаюць тэрміны зняволення. Некаторым палітвязням даводзілася рэзаць сабе вены, каб хаця б на час выйсці з ізаляцыі, у якую іх змяшчаюць адміністрацыі папраўчых установаў.
Усе папярэджанні беларускімі ўладамі і праваахоўнікамі ігнаруюцца, а прапагандысты выпускаюць хвалебныя рэпартажы пра тое, як цудоўна адбываць тэрмін у калоніі.
Чытайце таксама
