Аляксандр Лукашэнка 2 лютага прызначыў новага кіраўніка Дэпартамента фінансавых расследаванняў Камітэта дзяржкантролю і кіраўніка сакратарыята Усебеларускага народнага сходу, паведаміла прэс-служба палітыка.
Новым кіраўніком ДФР КДК стаў Андрэй Самбук, які раней быў начальнікам следчага ўпраўлення КДБ. У аб’яднанні былых сілавікоў BELPOL «Медыязоне» расказалі, што Самбук пачынаў службу ў 1999 годзе ў патрульна-паставой службе Савецкага РУУС Мінска. З 2000 да 2006 года ён праходзіў службу ў органах дазнання і папярэдняга расследавання. Даслужыўся да пасады старшага дазнавальніка. Пасля гэтага быў пераведзены ў цэнтральны апарат КДБ.
Месца начальніка следчага ўпраўлення КДБ зойме Канстанцін Бычак, які раней ад імені ведамства каментаваў рэзанансныя затрыманні і крымінальныя справы (у тым ліку і палітычныя). У канцы мінулага года Бычак адзначыўся тым, што анлайн падключыўся спачатку да семінара, які праводзіўся на пляцоўцы «Беларускага моладзевага хаба» ў Варшаве, а потым далучыўся ўжо да анлайн-занятку «Вольнага беларускага ўніверсітэта».
Пасада кіраўніка ДФР КДК заставалася вакантнай крыху больш за два месяцы. Раней яе займаў Ігар Маршалаў, які знаходзіўся ў камісіі па вяртанні беларусаў, што з’ехалі. Лукашэнка зняў яго з пасады ў лістападзе мінулага года і адправіў амбасадарам у Зімбабвэ.
Пасаду начальніка сакратарыята УНС заняў Валерый Міцкевіч. Ён дэпутат Палаты прадстаўнікоў Нацыянальнага сходу. Раней працаваў суддзёй, з 2001 да 2009 года быў намеснікам міністра юстыцыі, чальцом Цэнтрвыбаркама, дырэктарам Нацыянальнага цэнтра законапраектнай дзейнасці, а таксама кіраваў Нацыянальным цэнтрам заканадаўства і прававых даследаванняў. З 2009 да 2019 года Валерый Міцкевіч быў намеснікам кіраўніка Адміністрацыі Лукашэнкі.
— Я прыцягваю ўсіх дасведчаных людзей, каб у гэты складаны перыяд нам дзесьці не зрабіць памылкі. Напэўна, сам адчуваеш, што ідзе такая перабудова, пертурбацыя органаў улады ў сувязі з наданнем Усебеларускаму народнаму сходу канстытуцыйных паўнамоцтваў — становіцца канстытуцыйным органам. І, вядома, трэба гэтыя гады (год-два, можа, тры) са з’яўленнем УНС і нададзеных (яму. — Заўв. рэд.) сур’ёзных уладных канстытуцыйных паўнамоцтваў, нам бы ў гэты час не стварыць нейкі хаос ва ўладзе. Таму што, сам ведаеш, хаос ва ўладзе — імгненна пераносіцца гэта ў грамадства, — сказаў Лукашэнка, зацвярджаючы на пасадзе Міцкевіча.