Эдзікас Ягелавічус, які расшукваецца ў Літве, прабавіў час прэзідэнцкіх выбараў у Беларусі як «незалежны міжнародны назіральнік», піша LRT. Увечары асноўнага дня галасавання дзяржагенцтва БЕЛТА цытавала яго словы пра вельмі дэмакратычны працэс выбараў у краіне. Раней мужчына ездзіў як «назіральнік» на акупаваныя РФ тэрыторыі Украіны.
Выбары-2025, як і любая электаральная кампанія пасля прыходу ў 1994 годзе да ўлады Аляксандра Лукашэнкі, ні сумленныя, ні свабодныя. Падрабязней пра тое, як рэжым дзесяцігоддзямі крадзе галасы беларусаў і беларусак, мы расказалі ў праекце «Без выбару».
«Усё адбываецца вельмі дэмакратычна. Выбары праходзяць у атмасферы свята. Такога я нідзе не бачыў. У Літве ты проста прыходзіш і апускаеш бюлетэнь у скрыню. На ўчастку не грае музыка, ніякія артысты не танчаць і не спяваюць, буфеты не працуюць», — расказваў Эдзікас Ягелавічус беларускай дзяржпрапагандзе.
Мужчына з сакавіка 2023-га з’яўляецца кіраўніком зарэгістраванай у Беларусі грамадскай арганізацыі «Міжнародны форум добрасуседства». Пераехаў у Беларусь пасля візіту на акупаваныя РФ тэрыторыі Украіны.
Там ён таксама быў назіральнікам — на «рэферэндумах» у Луганскай, Данецкай, Запарожскай і Херсонскай абласцях Украіны, якія фіксавалі анексію Расіяй захопленых тэрыторый.
Пасля гэтага Ягелавічус быў абвешчаны Літвой у вышук па падазрэнні ў дзейнасці супраць дзяржавы. Акрамя таго, ён быў паплечнікам асуджанага за шпіянаж на карысць Расіі Альгірдаса Палецкіса.
Як адзначыў прадстаўнік арганізацыі «Еўрапейская платформа за дэмакратычныя выбары» Лукаш Кандрацюк, беларускі і расійскі рэжымы выкарыстоўваюць розных маргінальных палітыкаў і актывістаў з-за мяжы з прапагандысцкімі мэтамі, каб стварыць ілюзію легітымнасці сфальсіфікаваных выбараў.
«Іх малююць як важных асобаў дзеля прапаганды, каб паказаць унутранай аўдыторыі: глядзіце, усе замежнікі назіралі за выбарамі і заявілі, што яны былі сумленнымі», — сказаў Кандрацюк.
Чытайце таксама
