Міністр унутраных справаў Іван Кубракоў заявіў, што пасля рэйдаў міліцыі па «дармаедах» у Мінску людзі пачалі часцей звяртацца ў цэнтры занятасці насельніцтва. На гэта звярнула ўвагу выданне Reform.news. Нагадаем, міліцыю прыцягваюць для працы з «утрыманцамі» і ў рэгіёнах.
— Як толькі мы пачалі гэтую працу па горадзе Мінску, вельмі шмат выяўляецца сем’яў, у якіх таксама знаходзяцца дзеці, якім, так скажам, мала надаецца ўвагі бацькамі. Мы ставім іх на ўлік, працуем разам з медыцынай. І сёння мы ўжо бачым вынікі нашай працы. Сёння да падраздзяленняў працы і сацабароны, як дакладваюць мне супрацоўнікі мінскай міліцыі, ужо выстройваюцца чэргі, — расказаў Іван Кубракоў.
Нагадаем, сёлета сілавікі пачалі праводзіць рэйды па адрасах людзей, якія лічацца не занятымі ў эканоміцы. У першую чаргу, як заяўлялася, гэта закранае тых, хто выйшаў з месцаў пазбаўлення волі, хто «раней трапляў у поле зроку міліцыі». У сталічнай міліцыі лічаць, што так яны «аказваюць дапамогу ў працаўладкаванні».
На ўліку беспрацоўнымі ў цэнтрах занятасці, паводле звестак на 1 лютага, стаяла 3,1 тыс. чалавек. За месяц да таго — 2,6 тыс.
«Дармаеды» цяпер аплачваюць па поўных тарыфах некаторыя жыллёва-камунальныя паслугі — ацяпленне, гарачую ваду і газ. Кошт першых дзвюх паслуг для «ўтрыманцаў» у 5,5 разу вышэйшы, чым для астатняга насельніцтва.
Пры гэтым чыноўнікі не адмовіліся ад ідэі ўвесці для «дармаедаў» абмежаванні па бясплатнай медыцыне.
Чытайце таксама
