Студэнтка Гомельскага дзяржаўнага медыцынскага ўніверсітэта Кацярына Фільчанка ў новым выпуску шоу «Да!Но» на СТБ паспрабавала давесці прапагандысту Рыгору Азаронку, што беларусы, якія ездзяць па паўсядзённыя тавары ў Польшчу, не монстры.
Праграма была прысвечаная цэламу спектру беларуска-расійскіх адносін. У пачатку шоу Рыгор Азаронак папракнуў беларусаў, якія ездзяць у Польшчу «на закупы».
— У нас, прабачце, мара: паехаць кавы гэтай закупіцца, яшчэ нешта, а там ім раскажуць пра дэмакратыю, якую-небудзь яшчэ хрэнь і ўсё астатняе.
— Чаму вы думаеце, што, калі людзі едуць у Польшчу, каб купіць нейкі тавар, яны слухаюць нешта пра дэмакратыю і адразу становяцца монстрамі ў вашых вачах? — паспрачалася з прапагандыстам студэнтка-медык.
— Бо дзе сэрца тваё, дзе кашалёк твой, там і думкі твае.
— Вельмі перадузята ставіцеся, — папракнула Азаронка Кацярына Фільчанка.
— Я абсалютна перадузята стаўлюся.
— Глядзіце, магчыма, кіраўнікі Польшчы, людзі, якія на чале стаяць, — гэта нашыя ворагі, але звычайныя людзі — да іх неабавязкова трэба ставіцца з такім негатывам.
— Наадварот, мы адкрылі межы. Прыязджайце і купляйце бензін, соль, запалкі і цукар.
— Але самі ні ў якім разе не едзьце туды?!
— Колькі было гісторый, калі дальнабойшчыкі проста працавалі, ездзілі, а на межах іх пачыналі вербаваць, яны пераходзілі, нейкія з імі спецслужбы размаўлялі. Гэта ж усё працуе, — упэўнены Азаронак.
Знайшлася ў аўдыторыі шоу і студэнтка, у якой ёсць знаёмы дальнабойшчык, што «абвандраваў усю Еўропу і прыязджае да нас у Рэспубліку Беларусь казаць, якая Еўропа квітнеючая краіна».
— [Ён расказваў:] «Я там столькі апельсінаў наеў, бо яны валяюцца проста на дарозе». Дык, прабач, ты што, у Беларусі гэтых апельсінаў не можаш паесці? — здзівілася знаёмая дальнабойшчыка, што «абвандраваў ўсю Еўропу» — Анастасія Кузняцова з Гомельскага дзяржуніверсітэта.
Іншы студэнт таксама перасцярог беларусаў перад паездкамі за мяжу. Бо падчас вайны з Напалеонам «рускія афіцэры прыйшлі ў Францыю, убачылі, як там людзі жывуць, вярнуліся сюды і зрабілі дзекабрысцкае паўстанне».
— Яны пабывалі, убачылі, што там лепш, прыехалі сюды і вырашылі зрабіць так і ў нас, — абурыўся ўдзельнік шоу.
Чытайце таксама
