Міністэрства адукацыі Беларусі прыняло пастанову, якая выпраўляе памылку ў беларускай версіі дакументаў пра атрыманне адукацыі. Папраўкі ведамства апублікаваныя на Нацыянальным прававым інтэрнэт-партале.
Раней у атэстатах і дыпломах быў памылковы надпіс «фамілія і ініцыялы», цяпер яго заменяць правільным «ініцыялы і прозвішча».
У Мінадукацыі прызнавалі тэхнічную памылку, але адзначалі, што ў беларускай мове выкарыстоўваецца слова «фамілія». Ліст пра гэта з подпісам намесніка міністра Аляксандра Кадлубая быў разасланы ў выканкамы, пісала «Наша Ніва».
Аднак слова «фамілія», згодна са згаданым у лісце слоўнікам, абазначае не асабістыя звесткі, а род ці некалькі пакаленняў, якія маюць аднаго продка, альбо сям’ю.