Пакупнікі кітайскай анлайн-крамы AliExpress скардзяцца на доўгія тэрміны дастаўкі пасылак у Беларусь. «Люстэрка» расказвае, колькі ім даводзіцца чакаць і ў чым можа быць прычына.
«Пасылка больш за шэсцьдзесят дзён у дарозе»
У тэматычных суполках карыстальнікі скардзяцца, што ў Беларусь не даходзяць некаторыя пасылкі з AliExpress. Мяркуючы з паведамленняў карыстальнікаў, агульная прыкмета захраслых адпраўленняў — трэк-нумары, што пачынаюцца з сімвалаў CNG.
— З верасня рэзка перасталі прыходзіць пасылкі, трэк-нумар якіх пачынаецца на CNG. З іншым трэкам хутка прыходзяць. Раней не было такога, — напісала карыстальніца «ВКонтакте» Наталля.
— Такая ж гісторыя, — адказаў ёй карыстальнік Ігар. — Пасылка больш за шэсцьдзесят дзён у дарозе, і невядома, прыйдзе ці не.
— І ў мяне дзве пасылкі з такім трэкам захраслі невядома дзе. Няма адсочвання з 6 верасня. Спрэчку адкрыць сістэма не дае, — піша Ірына.
На форуме, прысвечаным атрыманню пасылак, удакладняюць: такія адпраўленні перамаркіроўваюць — то-бок прысвойваюць іншы трэк-нумар. Даведацца новы нумар можна праз спецыялізаваныя анлайн-сэрвісы — напрыклад, праграму TrackChecker ці сайт Postal Ninja.
Дзе захрасаюць пасылкі і што рабіць?
Новы трэк-нумар можа даць падказку пра тое, калі чакаць пасылкі, звярнуў увагу адзін з карыстальнікаў форуму.
Калі апошнія літары ў нумары UZ — значыць, адпраўленне пайшло праз Узбекістан, такія пасылкі «ў сярэднім за тры тыдні прыходзяць з улікам часу на адпраўку». А вось калі нумар заканчваецца літарамі TW — значыць, пасылку дастаўляюць праз Тайвань, і трэба падрыхтавацца да доўгага чакання.
— У мяне з Тайваня нічога не прыходзіць ужо месяцы тры амаль, — расказаў карыстальнік Krent. — То-бок як у бездань. Паказвае, што прыйшлі нібыта ў Беларусь <…> і далей знікаюць. Зразумела, што і не трэкаецца пасля гэтага. Самае кепскае, што ў прадаўцоў не відаць, дзе адпраўляюць праз Тайвань. Калі TW, то як у ваду. Усе астатнія нармальна даходзяць, UZ і інш. Спрэчак пакуль не адкрываў, бо там усякая дробязь.
Карыстальнікі форуму раяць сачыць за «тэрмінам абароны» ў замове на AliExpress. Калі гэты тэрмін скончыўся — можна адкрыць «спрэчку» з прадаўцом і папрасіць вярнуць грошы.
— У мяне таксама кучка дробных пасылак з Кітая спазнілася (не прыйшла), самая першая 84 дні ўжо «ў дастаўцы». Вось на гэтым тыдні спрэчкі выйграла, — напісала карыстальніца пад нікам petrikom.
Дарэчы, як мінімум два карыстальнікі расказалі, што ўсё ж дачакаліся дастаўкі тавараў, «захраслых» у працэсе дастаўкі праз Тайвань. У абодвух чаканне заняло каля трох з паловай месяцаў. Адзін з іх падзяліўся, што паспеў атрымаць грошы назад.
Чытайце таксама
