У Міністэрстве абароны Расіі заявілі, што ўначы нанеслі ўдары «высокадакладнай зброяй вялікай далёкасці» па аб’ектах УСУ на аэрадромах. Ва ўкраінскім Генштабе паведамілі, што на Бахмуцкім напрамку расійскія войскі спрабавалі наступаць на паўночны ўсход ад Арэхава-Васільеўкі і ў кірунку Іванаўскага. У амерыканскім Інстытуце вывучэння вайны расказалі, за што Прыгожын мог пакрыўдзіцца на Пуціна.
Расказваем пра галоўнае са зводак штабоў і высноваў экспертаў на 460-ы дзень вайны ва Украіне.
Генштаб УСУ: У раёне Мар'інкі адбілі 12 атак
За мінулыя суткі Расія нанесла 97 авіяцыйных удараў (у прыватнасці, выкарыстала 59 іранскіх ударных БПЛА Shahed, 58 з іх былі збітыя), правяла 39 абстрэлаў з рэактыўных сістэм залпавага агню па пазіцыях УСУ і населеных пунктах.
— Расійскія войскі асноўныя намаганні засяроджваюць на спробах поўнай акупацыі Луганскай і Данецкай абласцей. За мінулыя суткі падраздзяленні Сіл абароны адбілі 19 атак праціўніка.
— На Северскім і Слабажанскім напрамках расійскія войскі нанеслі авіяўдары ў раёнах сямі населеных пунктаў Сумскай і Харкаўскай абласцей. З мінамётаў і артылерыі абстралялі 19 населеных пунктаў Чарнігаўскай, Сумскай і Харкаўскай абласцей.
— На Купянскім напрамку праціўнік вёў беспаспяховыя наступальныя дзеянні ў раёне Масютоўкі. Нанёс авіяўдар у раёне Кіслоўкі Харкаўскай вобласці. Артылерыйскім і мінамётным абстрэлам падвергліся дзевяць населеных пунктаў Харкаўскай вобласці.
— На Ліманскім напрамку расійскія войскі наступальных дзеянняў не праводзілі. Нанеслі авіяўдары ў раёнах сямі населеных пунктаў Харкаўскай, Луганскай і Данецкай абласцей. З артылерыі абстралялі пяць населеных пунктаў Луганскай і Данецкай абласцей.
— На Бахмуцкім напрамку расійскія сілы беспаспяхова спрабавалі наступаць на паўночны ўсход ад Арэхава-Васільеўкі і ў кірунку Іванаўскага. Нанеслі авіяцыйныя ўдары ў раёнах пяці населеных пунктаў Данецкай вобласці. Ад абстрэлаў пацярпелі 11 населеных пунктаў вобласці.
— На Аўдзееўскім напрамку расіяне нанеслі авіяцыйныя ўдары ў раёнах Аўдзееўкі, Вадзянога, Першамайскага Данецкай вобласці. З артылерыі абстралялі тры населеныя пункты Данецкай вобласці.
— На Мар'інскім напрамку адбілі 12 атак расійскіх войскаў у раёне горада Мар'інка. Расіяне нанеслі авіяцыйны ўдар каля Мар'інкі і абстралялі Перамогу ў Данецкай вобласці.
— На Шахцёрскім напрамку беспаспяховыя наступальныя дзеянні расіяне вялі ў раёне Вялікай Навасёлкі Данецкай вобласці. Нанеслі авіяўдар каля Вуглядара. Абстралялі шэсць населеных пунктаў.
— На Запарожскім і Херсонскім напрамках расійскія войскі працягваюць весці абарончыя дзеянні. Нанеслі авіяцыйны ўдар у раёне Берыслава Херсонскай вобласці. Абстралялі 20 населеных пунктаў Данецкай, Запарожскай, Херсонскай абласцей і горад Херсон.
— Авіяцыя Сіл абароны за суткі нанесла 15 удараў па раёнах канцэнтрацыі асабовага складу і ваеннай тэхнікі праціўніка, а таксама шэсць удараў па яго зенітна-ракетных комплексах.
— Знішчаны БПЛА разведвальнага тыпу.
— Падраздзяленні ракетных войскаў і артылерыі пабілі тры раёны канцэнтрацыі ўзбраення і ваеннай тэхнікі, зенітны ракетны комплекс С-300 і зенітны ракетны комплекс «Тор», шэсць пунктаў кіравання, станцыю радыёэлектроннай барацьбы, артылерыйскае падраздзяленне на агнявой пазіцыі і склад боепрыпасаў расійскіх войскаў.
Мінабароны РФ: Спынілі дзеянні дзвюх украінскіх ДРГ
У Міністэрстве абароны Расіі заявілі, што ўначы нанеслі ўдары «высокадакладнай зброяй вялікай далёкасці» і пабілі «камандныя пункты і радыёлакацыйныя пасты, а таксама авіяцыйную тэхніку, сховішчы з узбраеннем і боепрыпасамі УСУ».
— На Купянскім напрамку ўдарамі авіяцыі і агнём артылерыі Заходняй групоўкі войскаў пабітыя падраздзяленні УСУ ў раёнах населеных пунктаў Навамлынск, Кіслоўка, Глушкоўка Харкаўскай вобласці і Стальмахоўка Луганскай вобласці. У раёнах населеных пунктаў Сінькоўка Харкаўскай вобласці і Розаўка Луганскай вобласці спынілі дзеянні дзвюх украінскіх дыверсійна-разведвальных груп.
За суткі знішчаныя да 65 украінскіх вайскоўцаў, тры аўтамабілі, а таксама гаўбіцы Д-20 і Д-30.
— На Чырвона-Ліманскім напрамку авіяцыяй, агнём артылерыі групоўкі войскаў «Цэнтр» нанесенае паражэнне падраздзяленням УСУ ў раёнах населеных пунктаў Макееўка, Чырвоная Дзіброва Луганскай вобласці і Грыгораўка Данецкай вобласці.
Знішчаныя да 55 украінскіх вайскоўцаў, два пікапы, гаўбіца Д-20, а таксама самаходная артылерыйская ўстаноўка «Гваздзік».
— На Данецкім напрамку ў выніку актыўных дзеянняў падраздзяленняў, удараў авіяцыі і агню артылерыі Паўднёвай групоўкі войскаў за суткі знішчаныя да 145 вайскоўцаў, дзве баявыя браніраваныя машыны, два пікапы, а таксама гаўбіца Д-30 УСУ.
У раёне населенага пункта Арлоўка Данецкай вобласці знішчаная радыёлакацыйная станцыя контрбатарэйнай барацьбы AN/TPQ-50. У раёне населенага пункта Максімільянаўка Данецкай вобласці знішчаныя два склады з боепрыпасамі 79-й дэсантна-штурмавой брыгады УСУ.
— На Паўднёва-Данецкім і Запарожскім напрамках ударамі авіяцыі і агнём артылерыі групоўкі войскаў «Усход» нанесенае паражэнне падраздзяленням УСУ ў раёнах населеных пунктаў Вуглядар Данецкай вобласці, Малінаўка, Белагор’е і Каменскае Запарожскай вобласці.
За суткі на гэтых напрамках знішчаныя да 140 украінскіх вайскоўцаў, дзесяць аўтамабіляў, а таксама дзве гаўбіцы Д-30. Акрамя таго, у раёне населенага пункта Атраднае Данецкай вобласці знішчаны склад боепрыпасаў УСУ.
— На Херсонскім напрамку ў выніку агнявога паражэння за суткі знішчаныя да 20 украінскіх вайскоўцаў, тры пікапы, гаўбіца Д-30 і дзве самаходныя артылерыйскія устаноўкі «Гваздзік».
Усяго, паводле МА РФ, за мінулыя суткі пабітыя 87 артылерыйскіх падраздзяленняў, жывая сіла і ваенная тэхніка УСУ ў 124 раёнах. У раёне населенага пункта Берыслаў Херсонскай вобласці пабіты ангар з узбраеннем і ваеннай тэхнікай 126-й брыгады тэрытарыяльнай абароны. У раёне населенага пункта Аўдзееўка Данецкай вобласці пабітыя камандна-назіральны пункт падраздзялення і склад ракетна-артылерыйскага ўзбраення 110-й механізаванай брыгады УСУ.
Сродкамі СПА перахопленыя тры крылатыя ракеты Storm Shadow і 13 рэактыўных снарадаў сістэмы залпавага агню HIMARS. Знішчаныя 14 беспілотных лётных апаратаў.
Інстытут па вывучэнні вайны: тэмпы расійскіх аперацый вакол Бахмута застаюцца прыкметна нізкімі
Уладальнік ПВК Вагнера Яўген Прыгожын, відаць, зноў ускосна падарваў аўтарытэт прэзідэнта Расіі Уладзіміра Пуціна, гаворыцца ў свежай справаздачы амерыканскага Інстытута вывучэння вайны (ISW). Эксперты адзначаюць, што Прыгожын адказаў на пытанне журналіста пра забарону СМІ любых дыскусій пра ПВК Вагнера, заявіўшы, што ад такой цэнзуры бюракраты выйграюць у найбліжэйшыя месяц-тры, «перш чым рускі народ пачне супраціўляцца» і ненавідзець іх. Потым Прыгожын пераключыў абмеркаванне з размовы пра расійскіх чыноўнікаў на непасрэдны зварот да аднаго чалавека. «Калі вы пачынаеце вайну, калі ласка, майце характар, волю і сталёвыя яйкі — і толькі тады вы зможаце чагосьці дамагчыся», — заявіў кіраўнік ПВК. У Інстытуце лічаць, што каментары Прыгожына, хутчэй за ўсё, адрасаваныя Пуціну.
На думку экспертаў, Прыгожын можа нападаць на Пуціна за тое, што той не даў яму абяцанай узнагароды за захоп Бахмута. Расійскае Мінабароны, магчыма, наўмысна сабатавала Прыгожына за некалькі дзён ці тыдняў да 9 траўня, каб перашкодзіць ПВК захапіць астатнія некалькі кварталаў у заходнім Бахмуце да гэтай даты. Пуцін, магчыма, наўмысна праігнараваў «дыверсію» Мінабароны, каб унікнуць выканання абяцання, якое, на думку Прыгожына, даў яму Пуцін. Прыгожын раней заяўляў, што калі б яму далі 200 тысяч чалавек, «Вагнер» дамогся б яшчэ большых поспехаў на перадавой. Гэтая заява і яго ранейшыя паводзіны могуць сведчыць пра тое, што Прыгожын збіраўся пашырыць «Вагнер» за кошт рэгулярных расійскіх узброеных сіл або замяніць расійскіх вайсковых чыноўнікаў звязанымі з ім людзьмі, адзначаюць у ISW.
«Выпады Прыгожына ў адрас Пуціна і Мінабароны Расіі — у спалучэнні з яго пахвальбой дасягненнямі „Вагнера“ — могуць сведчыць, што Прыгожын расчараваны тым, што не атрымаў абяцанай кампенсацыі за перамогу ў бітве за Бахмут», — мяркуюць аналітыкі.
Яны таксама адзначаюць, што вывад сіл ПВК з Бахмута можа працягвацца пасля вызначанага Прыгожыным першапачатковага тэрміну 1 чэрвеня і працягнуцца да 5 чэрвеня. У ISW кажуць, што вагнераўцаў там могуць замяніць байцы «добраахвотніцкіх фармаванняў» і сілы самаабвешчанай ДНР. Аналітыкі не выключаюць, што перакідванне іх у Бахмут можа знізіць тэмп расійскіх наступальных аперацый на фронце Аўдзееўка — Данецк.
Што да тэмпаў расійскіх аперацый вакол Бахмута, то яны застаюцца прыкметна нізкімі. Эксперты кажуць, што гэтым можа скарыстацца, калі пажадае, украінскі бок, «для пачатку новага раўнда аперацый вакол горада».
На што яшчэ звярнулі ўвагу эксперты:
- расійскія войскі правялі абмежаваныя наземныя атакі на паўночны ўсход ад Купянска і на рубяжы Сватава — Крамянная;
- расійскія войскі вялі абмежаваныя наступальныя дзеянні на фронце Аўдзееўка — Данецк;
- расійскія сілы працягвалі абстрэльваць раёны на поўдні Украіны;
- расійскія акупацыйныя ўлады працягваюць гвалтоўна дэпартаваць украінскіх дзяцей у Расію пад выглядам іх адпраўкі ў летнія лагеры.