У Валгаградскай вобласці Расіі зняволеныя калоніі захапілі закладнікаў, ёсць пацярпелыя, паведамляе ФСВП РФ.
Захоп закладнікаў у калоніі № 19 строгага рэжыму ў горадзе Суравікіна Валгаградскай вобласці РФ адбыўся 23 жніўня падчас паседжання дысцыплінарнай камісіі. ТАСС паведамляе, што як мінімум адзін супрацоўнік ФСВП забіты, яшчэ некалькі параненыя. Нападнікаў было не менш за тры.
Паводле інфармацыі тэлеграм-канала «Сапа», людзі, што захапілі закладнікаў, патрабуюць 2 млн даляраў і верталёт.
Папярэдне, нападнікі заявілі пра прыналежнасць да «Ісламскай дзяржавы», паведамляе блізкі да расійскіх сілавікоў тэлеграм-канал Baza. Афіцыйнага пацверджання гэтай інфармацыі пакуль няма.
Канал паведамляе, што тры чалавекі загінулі, яшчэ некалькім удалося ўцячы ад захопнікаў. Сярод іх адзін супрацоўнік ПК і адзін зняволены. Іх шпіталізавалі з рэзанымі і пранікальнымі ранамі.
Усяго, паводле інфармацыі з розных крыніц, магло пацярпець ад чатырох да дзевяці чалавек. Сярод іх — начальнік калоніі Андрэй Дзявятаў, паводле звестак Baza, ён у рэанімацыі.
У сацсетках з’явіліся відэа захопу закладнікаў — на роліку відаць людзі, якія ляжаць на падлозе ў крыві, побач з імі стаяць узброеныя нажамі нападнікі. Адзін з іх утрымлівае мужчыну ў форме, што сядзіць на падлозе.
Дакладная колькасць закладнікаў невядомая. Да калоніі прыехаў спецназ, дарога да ўстановы перакрытая. СК Расіі распачаў крымінальную справу пра захоп закладнікаў.
Усяго ў калоніі знаходзіцца 1230 зняволеных.
Нагадаем, раней, 16 чэрвеня, у Растоўскай вобласці Расіі зняволеныя адной з камер захапілі ў закладнікі двух супрацоўнікаў СІЗА-1 — начальніка аператыўнага ўпраўлення і малодшага дзяжурнага ўстановы. Пазней у выніку аперацыі зняволеныя былі ліквідаваныя. Тады ў сацсетках распаўсюдзілася відэа з мужчынам з нажом, які казаў, што ізалятар захоплены баевікамі «Ісламскай дзяржавы».